Taga Calvary Hills nahadlok sa cell sites

CEBU, Philippines - Mihangyo ang taga Calvary Hills Residents’ Association, Apas, dakbayan sa Sugbo nga ipabalhin ang duha ka cell sites sa ilang lugar sa pagtoo nga ang radiation ang hinungdan sa ilang pagpangasakit.

Ang duha ka cell sites ila sa Sun Cellular ug Globe Telecommunications Incorporated.

Matud ni Porponio Lapa Jr. presidente sa asosasyon, nga daghan na sa iyang mga silingan ang nangasakit og cancer ug gani uban kanila nangamatay na.

Laing rason nga gustong ipabalhin ang cell sites mao ang kahagip-ot sa ilang lugar ug maglisud na og agi ang mga sakyanan.

Matud ni Lapa nga sa dihang gitukod ang maong cell sites wala’y gihimong konsultasyon ngadto sa mga molupyo ug giingong gidali-dali ni kanhi barangay kapitan Clemente Rosales ang paghatag og permit.

Apan gihimakak ni Atty. Mariel Teves, abogado sa Globe Telecom, ang pasangil ni Lapa.

Matud niya nga kompleto sila sa papeles nga gikinahanglan alang sa pagpatukod sa cell site.

Iya usab giklaro nga ang radiation gikan sa cell sites dili sama sa makuha sa mga X-Ray machines ug CT Scans diin mas grabe ang dautang epekto sa panglawas.

Si Agnette Peralta sa Department of Health-7 miingon nga wala’y basehan ang giingon ni Lapa sanglit hangtud karon wala pa’y ebidensiya nga ang Radio Frequency Radiation usa sa mga hinungdan sa cancer.

Matud ni Peralta ang RFR makamugna lang og thermal heat nga maoy makapataas sa temperatura sa lawas sa tawo ug dili cancer.

Girekomendar ni Bise Mayor Edgardo Labella ang ocular inspection sa lugar kauban sa mga representante sa mga kompanya sa cell sites, DOH, CHRO, ug mga sakop sa committee on urban planning, health ug infrastructure sa konseho ug pangulohan ni Konsehal Lea Japson. (BANAT NEWS)