Taga Marawi niambak sa barko

CEBU, Philippines - Usa ka 25-anyos nga lalaki ang milayat gikan sa barko samtang naglawig gikan sa Hagnaya, San Remigio padulong sa Santa Fe, Isla sa Bantayan niadtong Martes, alas 9:30 sa buntag. Base sa taho sa kapolisan, giila ang maong pasahero nga si Jonaid Dirimbangun Waid, lumad nga taga Mulondo, dakbayan sa Marawi sa Mindanao.

Matud sa mga saksi nga miambak sa barko si Waid samtang naglawig kini sa taliwala sa kadagatan sa isla sa Gibitngil, Medellin ug Santa Fe.

Daling giluwas sa mga tripolante sa Island Shipping Express si Waid dihang nabantayan kini nga milayat sa barko.

Swerte nga buhi’ng naluwas si Waid sa mga tripolante ug gidala sa Santa Fe Police Station sa dihang nakadunggo na sa pantalan.

Base sa inisyal nga imbestigasyon, wala masuta ang rason sa paglayat sa maong pasahero. (BANAT NEWS)