Mga badlungong polis sa CCPO ipaubos sa ‘retraining program’

CEBU, Philippines - Mga polis nga dagko na og tiyan, magsige og absent ug dili motunga sa mga hearing sa kaso ug kadtong mga gidudahang drug protectors ipaubos sa usa ka retraining program nga maglakip sa values formation ug moral recovery program.

Kini maoy gipahibalo sa director sa Cebu City Police Office nga si Senior Superintendent Noli Romana tungod sa mga nadawat niya nga report nga dunay pipila ka mga pulis nga wala nagtinarong sa ilang serbisyo.

Gibutyag ni Romana nga dunay presinto nga dunay lima ka mga pulis nga kuhaon aron ipaubos sa maong programa tungod kay sila gidudahang protektor ug nagdawatan og kwarta gikan sa drug lords.

Lakip sa ipaubos niini kadtong di manungha sa ilang court duties aron mobarog isip testigos sa mga kaso, ang maong mga polis gipang-imbestigahan na usab tungod niini.

Ang plano ni Romana gisuportahan ni Police Regional Office (PRO) 7 director, Chief Superintendent Prudencio Bañas.

Matud pa ni Bañas nga kinahanglan nga physically fit ang usa ka pulis aron mahimong presentable sila sa publiko.

Gusto sab ni Bañas nga mopatuman og disiplina ang mga Provincial Directors, City Directors ug Station Commanders ngadto na sa ilang mga sakop, aron mas progresibo sila sa ilang trabaho. (BANAT NEWS)