2014 Sinulog Idol First Runner Up patay sa bangga

CEBU, Philippines - Patay ang usa ka kanhi Sinulog Idol human kini nabanggaan sa usa ka Suzuki Multicab  niadtong Martes sa hapon diha sa Barangay Duljo, Fatima ning dakbayan sa Sugbo. Ang biktima naila nga si Sheila Mae Bucog, 18, nga taga Laray, Inayawan Cebu City, Sinulog Idol 2014 First Runner Up,samtang nakaangkon sab og mga pangos sa kalawasan si Leobena Marine, 25, taga Barangay Mambaling ,Cebu City, nga apil sa  nadasmagan sa multicab.

Ang drayber sa multicab naila sab nga si Alan Villarin, mitug-an nga nawad-an kini og kontrol sa manobela hinungdan nga iyang nabanggaan si Bucog.

Basi sa imbestigasyon ni PO2 Wilfredo Caperida sa Traffic Patrol Group, nga si Bucog ang nag-atang og sakyanan sa maong lugar nga paingon na unta nga mouli sa ilang panimalay. Sumala pa ni Manuel Tagaan ang record in charge sa CITOM nga ang drayber sa multicab misulay pa unta og sibat sa lugar apan nakabangga na pud hinuon kini og usa ka motorsiklo nga gi-angkasan ni Marine.

Dali pa unta nga gidala sa Vicente Sotto Memorial Medical Center (VSMMC) ang mga biktima, apan nakabsan gayod sa kinabuhi si Bucog.  Ang project director sa Sinulog Idol nga si Gloria Villarojo gianugonan sa gidangatan ni Bucog tungod kay maayo kini nga singer.  (BANAT NEWS)