Usa sa giharos sa PUJ namatay

CEBU, Philippines - Usa sa mga tawong naharos sa usa ka jeep pasaheroan sa miaging adlaw  nakabsan sa  iyang kinabuhi sulod sa Cebu City Medical Center (CCMC) gumikan sa mga naangkon nga pangos ug bun-og sa kalawasan.

Kini maoy gitug-an ni Joy Tumulak ang Operations Chief sa City Traffic Operations Management (CITOM) nga nahinabi sa Banat News.  Ang namatay naila nga si Clarita Cabanero, 38, nga taga siyudad sa Carcar, human nakaangkon grabeng bun-og sa kalawasan tungod sa pagkapasok niini sa PUJ samtang kini nag- atang og masakyan  diha sa V. Rama, Barangay Guadalupe, Cebu City. Matud pa ni Tumulak nga pasado alas- 2 sa hapon nakabsan sa kinabuhi si Cabanero, apan pasado alas- 5 na sa hapon kini napahibalo sa mga kabanay ngadto kanila.

Sumala pa sa opisyal nga ila pa nga gipaabot ang pamilya sa namatay nga biktima kung mopasaka ba kini og kaso sa drayber nga si Jose Maghanoy, 47, nga taga M.J Cuenco, Cebu City.

Nasayran nga pito ka mga tawo ang giharos sa PUJ human nawad-an og kontrol sa manobela si Maghanoy.  - /EIM) (BANAT NEWS)