P3.5M Shabu nasakmit

CEBU, Philippines - Mokantidad sa P3.5 milyones nga gituohang shabu  ang nasakmit sa City Anti-Illegal Drugs Special Operation Task Force (CAIDSOTF) kauban ang Mabolo Police Station diha sa usa ka apartelle sa Barangay Apas ning dakbayan sa Sugbo kagahapon sa hapon.

Onse ka mga dagku nga putos sa shabu ang nakuha sa kapulisan nga gikatakda untang ihatud sa Talamban area, kini sumala pa ni Sr. Supt. Noli Romana, director sa Cebu City Police Office.

Ang mga nadakpan naila nga sila si Alcher Baynas, residente sa maong barangay ug Don Tan, nga taga Talamban kinsa nakuhaan usab og .38 revolver.

Matud pa sa hepe sa CAIDSOTF, Chief Inspector Eunil Avergonzado nga si Baynas usa ka level 2 drug pusher.

Sumala pa ni Avergonzado nga dunay nakahatag kanila og impormasyon kabahin sa  grabeng problema sa ilegal nga drugas sa maong lugar ug ang nagpasiugda niini mao si Baynas.

Tungod niini, usa ka operasyon ang gilusad gamit ang usa ka police asset nga mipalit og shabu kang Baynas nga nagkantidad  og P40 mil.

Sa pagpaniid sa kapulisan giingong ilang nabantayan si Tan nga nagsuyop og drugas duol sa lawak ni Baynas hinungdan nga giapil nila kini og sikop.

“Ingon aning kantidara sa shabu nga nakuha nato, dako na jud kaayo ni ang iyang duwa (operasyon),” matud pa ni Avergonzado.

Ang inahan ni Baynas nga si Eda misulay pa unta og pagpangutana sa kapulisan kung duna bay search warrant ang mga polis nga mihimo sa maong operasyon apan sa dihang gipakita kini sa nakuha nga shabu, wala na kini nakatingog pa.

Mibutyag hinoon ang inahan nga dugay na niya nga gibadlong ang ilang anak sa paghunong sa maong ilegal nga negosyo apan wala g’yud kini mipatuo kaniya.

Ang duha ka mga suspek ang gitanggong na karon sa Cebu City Police Office detention cell nga mag-atubang sa kalapasan sa sections 5, 11, 12, of RA 9165, paghupot sa ilegal nga drugas nga gikatakda nga ipasaka karong adlawa.  - /EIM (BANAT NEWS)