“Manglungkabay” nadakpan

CEBU, Philippines - Nadakpan nga lalaki sa paghupot og kutsilyo gitumbok nga suspetsado sa pagpanglungkab sa usa ka boarding house sa Barangay Tabok, Dakbayan sa Mandaue.

Usa ka Jimmy Pacho Jr. kinsa nawad-an sa iyang cellphone, salapi ug mga importanteng dokumento midangop sa kapolisan human gilungkab iyang lawak.

Matud pa ni Police Chief Inspector Monterroyo nga ang nadakpan mao si Ricky Clavero, 30, taga Barangay Danlag,  Lungsod sa Consolacion.

Nabawi kaniya ang mga butang sa biktima nga naglakip sa cellphone  ug PhilHealth ID, Voter’s ID ug School ID ug lakip na sa pitaka.

Dugang pa niya nga ang maong pagpanglungkab  dali nga gitaho sa biktima sa Presinto 3 sa Mandaue City Police Office (MCPO).

Ang mga barangay tanod maoy nakasigpat sa suspetsado nga giingong nabantayang kadudahan ang lihok ug dihang girekisa nasakpan kining nagdala og kutsilyo  ug ang mga butang ni Pacho.

Samtang gilungkab usab ang  buhatan sa Honda Motorworld sa Ibabao Estancia, sa mao gihapong dakbayan ug gisakiyo ang ilang laptop ug computer, sa pagsusi sa kapolisan diha milusot sa giguba nga luyo nga pultahan sa kasilyas ang kawatan.  - /EIM (BANAT NEWS)