Special desks ipahimutang sa Mandaue City Hall

CEBU, Philippines - Magbutang og special needs desks ang kagamhanan sa dakbayan sa Mandaue sa mga nagkalainlaing buhatan.

Kini base sa Executive Order No. 11 nga giluwatan ni Mayor Jonas Cortes nga nagmando sa pagbutang og special needs desk sa matag buhatan alang sa mga senior citizens, mabdos, ug lakip kadtong mga tawo nga adunay kabilinggan sa panglawas.

Ang kamandoan ni Cortes gipasubay usab sa nalatid sa Repulic Act 7277  o ang Magna Carta for Disabled Persons, Republic Act  9994 o ang Expanded Senior Citizens Act of 2010 ug Republic Act 9710 o ang Magna Carta of Women.

Kahinumduman nga si Bokal Thadeo Ouano sa gipalabang niyang ordinansa sa hunta probinsiyal nagmando alang sa pagpalakip sa paghatag og 20 porsiyento nga diskwento sa mga senior citizens sa ilang pagpalit og pagkaon ug mineral supplements.

Gipasabot ni Ouano nga ang balaud naghatag lang og diskwento sa mga bitamina o mineral supplements nga gi-prescribed sa mga doktor apan wala malakip ang mga food supplements. (BANAT NEWS)