Marijuana gisagol sa mga utanon
CEBU, Philippines - Gisagol sa gibiyaheng mga utanon ang 24 ka bundle nga marijuana nga nasakmit sa mga sakop sa City Intelligence Branch (CIB) gikan sa level 1 drug pusher sa Barangay Inayawan, dakbayan sa Sugbo. Kini ang gibutyag ni Supt. Romeo Santander, hepe sa CIB nga nahinabi sa Banat News base sa nakuha nilang impormasyon.
Matud ni Santander nga gikan sa lungsod sa Balamban ang maong mga marijuana ug ikatag unta pagbaligya sa dakbayan sa Sugbo ug mga silingang lugar. Nagtoo si Santander ang mga druglord migamit na og lain ideya aron lang makalusot ang ilang ilegal nga negosyo.
Nagduda usab si Santander nga gumikan sa kadaling ibaligya sa marijuana ug sa kadaku sa masapi, duna’y mga tigtumod og mga utanon nga mosugot nga isagol kini sa ilang baligya.
“Kung magbaligya man gud ka og mais ug uban pa nga utanon, bug-at, kung marijuana, gaan ug daku pa ang masapi,†matud ni Santander.
Gisubay karon sa kapolisan ang tag-iya sa marijuana gumikan sa dakung luna nga gitamnan niini base sa impormasyon.
Nagtoo usab ang opisyal nga dako ang posibilidad nga target unta sa maong mga drugas ang mga estudyante karon nga nagsugod na ang tingklase.
Nunot niini giawhag sa kapolisan ang mga ginikanan ug mga opisyal sa mga tunghaan nga pakusgan ang ilang pagmonitor aron dali nga masikop ang mga mosulay og payuhot sa drugas. (BANAT NEWS)
- Latest
