City health sa Mandaue naalarma sa mga kaso sa dengue

CEBU, Philippines - Sa unang upat ka bulan niining tuiga mikabat ngadto sa 22 ang kaso sa dengue sa dakbayan sa Mandue diin usa sa mga biktima ang namatay.

Sa maong insidente ang hepe sa city health office sa Mandaue naalarma na niini hinungdang migama dayon kini og lakang sa pagpahugot sa kampaniya batok sa dengue pinaagi sa pag-edukar sa mga molupyo sa kabarangayan sa siyudad.

Ang city health officer sa siyudad nga si Dr. Edna Seno mipadala sa iyang mga health personnel ngadto sa mga suoton nga lugar sa 27 ka barangay sa Mandaue.

Matud ni Seno nga ang mga opisyal sa barangay duna usab kini dakung obligasyon ngadto sa mga molupyo sa ilang lugar sa pagpahimangno o paghatag og kasayoran sa ilang buhaton nga malikay sa sakit

Ang city health office sa siyudad miawhag kini sa mga molupyo sa kabarangayan   sa pagpadayon sa four o’clock habit nga mao ang pagpanglimpiyo sa palibot aron walay mga lamok nga mopuyo.                  

Sa taho sa buhatan sa Department of Health (DOH)-7 nasayran nga ang kinatibuk-ang biktima sa dengue sa Central Visayas gikan sa buwan sa Enero hangtud sa Mayo sa milabay’ng tuig mikabat ngadto sa 6,294.

Apan sa samang mga bulan niining tuiga ang maong gidaghanon mikunhod kini diin dunay 1,150 lang ang natalang kaso sa dengue sa Regional Epidemiology and Surveillance Unit (RESU)-7 sa DOH.  (BANAT NEWS)