Bayot gidunggab sa uyab

CEBU, Philippines - Naangol ang usa ka bayot human kini dunggaba sa buko-buko sa nagselos niini nga hinigugmang lalaki niadtong Sabado sa kadlawon diha sa dalan M.L. Quezon, Barangay Pusok, dakbayan sa Lapu-Lapu.

Si PO1 Jomar Florentino sa homicide section sa kapolisan sa maong dakbayan miila sa biktima nga mao si Joselito Berame Booc alyas “Carla”, 40-anyos ug ang nagdunggab mao si Rodel Betor, 21-anyos, pulos nagpuyo sa maong dapit.

Matud ni Florentino nga padulong na sa pagsakay sa multicab nga pasaheroan ang biktima dihang gigukod kini sa suspetsado ug gidunggab ang buko-buko niini.

Human sa maong pagdunggab dali nga misibat pahilayo sa maong dapit ang suspetsado ug ang biktima dali usab nga gihatud sa iyang mga higala ngadto sa Lapu-Lapu City Hospital human sa paghatag og pasiunang pagtambal sa mga doktor dali kining gibalhin ngadto sa Vicente Sotto Memorial Medical Center sa dakbayan sa Sugbo.

Matud usab ni Florentino nga ang biktima dihang ilang gisukit-sukit misulti nga nagselos ang suspetsado tungod kay nakighigala siya ngadto sa laing lalaki.  (BANAT NEWS)