Mibayad og fake money gipatay

CEBU, Philippines - Duha ang patay sa buwag nga pagpamusil diha sa lungsod sa Sibonga sa nakalabay nga adlaw diin ang usa sa biktima giingong mibayad og peke nga kwarta sa ilang giinom nga bino.

Pasado alas -8 sa gabii sa nakalabay nga adlaw patay ang usa ka mag-uuma nga si Junrey Alcarez, 26, taga Barangay Ba-e, Sibonga, human kini gipusil sa makadaghan nga higayon sa wa pa mailhing tawo.

Si SPO1 Antonio Sanchez sa Sibonga Police Station nga nahinabi sa Banat News mitug-an, nga gikan nag-inom ang biktima kauban ang iyang mga silingan nga sila si Jeric Matugas, Jimboy Serbano, Arnel Quinto ug Mark Larao sa usa ka tindahan nianang gabii.

Apan gikataho nga human sa ilang tagay, mibayad og P200 nga peke nga kwarta ang biktima sa tindahan apan nasakpan sa tag-iya mao nga ang kauban na lang niini ang mibayad sa ilang giinom ug namauli sa ilang tagsa tagsa ka panimalay. Pipila ka minutos ang milabay, sunod sunod nga buto sa armas ang nadungog sa iyang mga kauban sa lugar diin mitipas ang biktima, apan gumikan sa kahadlok wa nay misusi kung kinsa ang gipusil.

Nianang pagkabuntag nadiskubrehan  sa usa ka 16-anyos nga residente ra sab sa maong lugar ang patay nga lawas sa biktima nga nagbuy-od sa kasagbotan. Napulo ka basiyo sa .45 kalibre nga bala ang nakuha sa crime scene ug natusak sa bala ang kalawasan ni Alcarez. Gihulagway ni SPO1 Sanchez nga grabe ang kasuko sa gibati sa naghimo sa krimen.

Wa hinuon matino kun may kalambigitan ba sa peke nga kwarta ang pagpatay kaniya.

Samtang giimbestigar usab sa kapolisan ang pagpusil patay sa usa ka wala mailhing libud-suroy nga giingong kusog manghilabot diha sa Sitio Dalakit, Barangay Manatad sa mao gihapong lungsod.

Ang biktima nakaangkon og usa ka samad pinusilan sa iyang kilid ug nagbuy-od na sa yuta dihang napalgan. 

Matud pa ni SPO1 Sanchez nga posibling natripingan lang ang maong biktima sa mga bugoy sa maong lugar. (BANAT NEWS)