Rama supak sa ‘militarisasyon’ sa Kamagayan

CEBU, Philippines - Dakong supak si Mayor Michael Rama nga butangan og police ug militar ang Barangay Kamagayan aron sa pagsumpo sa ilegal nga drugas ug prostitusyon.

Niadtong Miyerkules atol sa sesyon sa Cebu City Council nauyonan sa mga konsehal ang sugyot ni Konsehal James Cuenco nga nanawagan sa kapolisan ug AFP Central Command aron magbutang og checkpoints sa maong barangay.

Gusto ni Cuenco, kinsa maoy tsirman sa committee on tourism nga mabalik ang imahe sa maong barangay nga usa sa mga nindot suroyan kaniadto.

Sumala pa ni Rama nga dunay laing mga solusyon pagsumpo sa maong problema .

Gusto sa mayor nga mas maayong i-reblocking  ang maong barangay, tarungon ang mga pasilidad sama sa mga suga, dalan ug palimpyohan ang maong dapit.

Nangayo hinuon og pagsabot si Rama sa mga residente sa mao niyang plano. Buot ni Rama nga maila pagbalik ang maong dapit pinaagi sa palambuong Citi Center nga karon gihimo nang pinuy-anan sa mga illegal settlers inay nga usa ka merkado. (BANAT NEWS)