Nag-amok napusilan patay
CEBU, Philippines - Lalaking naghuramentado ug nang-hostage og silingan napulisan patay sa miresponde nga polis kagahapon sa Barangay Paril, Cebu City. Giila ang namatay nga si Erickson Malate, 27, nagpuyo ra ‘sab sa maong lugar, caretaker sa uma sa usa ka Jemari Lanza, 21, human napusilan ni PO1 Junray Tagalog sa Talamban Police Station ug nadestino isip community cop sa maong barangay.
Matud pa ni Tagalog sa Banat News nga wala na siya’y lain pa nga nabuhat kun di ang pagpusil sa suspek human nga gi-hostage niini ang agalon nga si Lanza.
Si SPO4 Alex Dacua ang imbestigador sa Homicide Section sa Cebu City Police Office (CCPO) nga nahinabi sa Banat News mibutyag nga duna’y gama’y nga hikay ang gihimo sa panimalay ni Lanza gumikan namatay ang amahan niini sa nakalabay nga adlaw ug dunay daghang tawo sa ilang balay.
Apan sa wala nasayri nga hinungdan kalit lang nanghasi ang suspek ug gidunggab og buak nga botelya ang mga silingang sila si Salome Erana, 56, Isidro Wagas, 71, ug Leo Lanza nga paryente sa amo sa suspek, sila pulos nakaangkon og samad sa bukton ug ubang parte sa kalawasan. Dihang dakpon unta si Malate sa mga tawo misukol kini ug gibunlot ang agalong si Lanza ug gihimo kining hostage. Tungod niini nangayo sila og tabang kang PO1 Junray Tagalog.
Si Tagalog kauban ang mga barangay tanod sa maong lugar, misulay sa pagpakalma ni Malate apan misinggit hinoon kini nga iyang patyon si Jemari ug dihang gihataan na og dunggab ni Malate si Lanza gipusil kini ni Tagalog agi sa bintana. Nagtoo ang mga silingan nga ‘bangog’ sa drugas si Malate , si Tagalog mitahan sa iyang kaugalingon ug armas. (BANAT NEWS)
- Latest
