Solo parent’s ordinance gi-veto ni Mayor Rama

CEBU, Philippines - Minghoy ang mga solo parents dinhi sa dakbayan sa Sugbo tungod kay wala aprobahi ni Mayor Michael Rama ang ordinansa nga magpahatag unta kanila og ‘tag P5 mil nga hinabang-salapi kada tuig. Ang Cebu City Council miaprobar kaniadto’ng Mayo 7 sa City Ordinance 2395 nga naglatid paghatag og cash assistance sa mga solo parents kun padayon nila nga giatiman ang ilang gagmay’ng anak.

Si Mayor Rama wala mopirma sa ordinansa kay gihulagway niya kini nga “discriminatory” tungod kay kadto ra’ng mga nakabotar na sa miaging tulo ka sunod-sunod nga eleksyon ang makapahimulos sa benepisyo.

Ang mayor nagkanayon nga ang mao nga ordinansa nga gisugyot ni Konsehal Gerardo Carillo gikopya sa Republic Act 8972, apan matud ni Rama ang nasudnong balaod wala maglatid nga ang tabang sa kagamhanan mao kadto’ng nakabotar sa tulo ka miaging eleksyon.  Gitan-aw usab sa mayor ang pagsaway sa pipila ka sektor nga ang paghatag og cash assistance sa mga solo parents makapadasig sa uban nga mohimo’g “pre-marital sex” kay tabangan man sila sa kagamhanan. Apil sa giisip nga solo parents base sa ordinansa ni Carillo mao kadtong mga kapikas sa mga binilanggo nga padayong miatiman sa ilang mga anak. Si Carillo milantugi nga dili na maka-veto si Mayor Rama tungod kay ang ordinansa giaprobahan kaniadto pa’ng Mayo 7 apan ang iyang Veto Letter nadawat sa konseho sa miagi lang Hunyo 9. (BANAT NEWS)