BPPO full alert tungod sa engkwentro
CEBU, Philippines - Naka full alert status ang kapulisan sa probinsya sa Bohol, human sa nahitabong engkwentro tali sa kapulisan ug sa usa ka drug syndicate sa Bien Unido, Bohol. Kini samtang ang Commission on Human Rights-7 pinangulohan sa ilang imbestigador nga si Primo Cadampog mipahibalo nga maghimo sila og ocular inspections sa Bien Unido aron pagsuta kun lehitimong shootout o ‘rubout’ ang nahitabo.
Kini ang gipadayag ni Sr. Supt. Dennis Agustin ang hepe sa Bohol Provincial Police Office aron dili mokompiyansa ang iyang mga sakop sa posibleng bawos. Sumala pa ni Agustin nga hasta siya nakadawat na sab og mga hulga sa text apan gikataw-an lang kini sa opisyal kay di kaayo siya kasabot og pinulongang binisaya.
Gibutyag sab sa opisyal nga duna siya’y listahan sa mga aktibong polis sa iyang probinsya nga posibleng naapil sa ilegal nga kalihokan. Nakapasaka na ang kapulisan og kaso batok sa mga dinakpan ug sa misurender nga sakop ni Rosales og kaso nga illegal position of fire arms, explosives ug drugas.
Gipaabot pa usab nila ang rekomendasyon sa Department of Social Welfare and Development (DSWD) kun pasakaan nila og kaso ang menor de edad nga dinakpan nga giingong kolektor ug checker sa mga transaksyon sa drugas.
Ang bag-ong milingkod nga hepe sa PRO 7 Chief Superintendent Prudencio Bañas mipadayag na og suporta sa iyang tropa kung duna ma’y moreklamo sa engkwentro nga nahitabo. (BANAT NEWS)
- Latest
