Mga ilegal wagtangon sa Kamagayan

CEBU, Philippines - Adunay sugyot nga padestinohan og police-military detachment ang Barangay Kamagayan aron pagpalig-on sa kampanya sa kagamhanan pagsumpo sa problema sa ilegal nga drugas ug prostitusyon.

Si Konsehal James Cuenco, tsirman sa Committee on Tourism sa Cebu City Council, midiskurso atol sa ilang sesyon kagahapon ug miawhag sa kadagkoan sa kapolisan nga awhagon nila ang AFP Central Command aron modestino kini og mga militar sa Kamagayan.

Sugyot ni Cuenco nga ang mga sakop sa police-military detachment nga anha magbase sa Kamagayan mopahigayon og subsob nga checkpoint ug sutaon kinsa ang mga tawo nga mag-anhaan sa mao nga barangay, ilabi na sa gabii. Laing sugyot ni Cuenco mao ang pagpataud og daghang suga sa Kamagayan aron hayag kaayo panahon sa gabii ug makita na kaayo kadto’ng adunay mga dautan nga binuhatan.

Matud ni Cuenco nga bata pa siya kaniadto nga nadungog na ang Kamagayan, ilabi na ang Junquera, nga “red light” district tungod sa kadaghan sa mga babaye nga mamaligya sa ilang dungog apan misamot ang problema pagtumaw na sa pagpamaligya og shabu.

Si Cebu City Police Director Noli Romana miingon nga plano karon sa kapolisan ug sa kadagkoan sa City Hall nga magmugna og Task Group nga idestino diha sa mao nga dapit aron masumpo ang ilegal nga kalihukan sa Kamagayan.

Dunay mga molupyo sa Kamagayan sama ni Letecia Wenceslao, 54, nga pabor kaayo nga destinohan og Joint AFP-PNP detachment ang ilang dapit.

Si Konsehal Rico Ramirez miangkon nga daghan sa ilang mga molupyo sa Barangay Kamagayan nga nalambigit sa ilegal nga kalihukan.

Diha’ng gibisitahan sa mga reporters ang Kamagayan kagahapon sa hapon, nakit-an g’yud mismo nga adunay tawo nga diha ra daplin sa karsada nga gituslok ang bukton ug injection nga adunay Nubain. Ang Nubain usa ka matang sa pain killer apan giabusohan kini sa mga adik nga tiggamitan og injectable drugs. (BANAT NEWS)