Lalaki nga nangape gipusil patay

CEBU, Philippines -  Patay na nga nahidangat sa tambalanan ang usa ka tawo nga gipusil sa gawas sa ilang panimalay alas- 8 pasado ang takna sa buntag sa Sitio Kabatuan, Barangay Pajac, Dakbayan sa Lapu-Lapu. Si Senior Inspector Zenaido Pastorfide Jr., hepe sa Homicide Section sa kapolisan sa Lapu-Lapu City Police Office (LLCPO) miila sa biktima nga mao si Ricky Hisouler, 29, lumad nga taga Sitio Kalubang, Barangay Lagasan, Lungsod sa Barili ug temporaryong nagpuyo sa maong dapit.

Matud pa nga nangapi pa ang biktima ug naglingkod sa bangko sa gawas sa gipuy-an niining panimalay dihang kalit lang nga nahidangat ang duha ka wala hiilhing lalaki nga nagpangita niini. Giduol ang biktima ug nakig-estorya sa duha apan mibunot og  pusil ang mga suspek hinungdan nga midagan ang biktima apan gigukod kini ug gipusil tulo ka higayon.

Daling miikyas ang mga mamumuno samtang gidala sa Lapu-Lapu City Hospital si Hisouler  apan gideklarar kini nga patay         na.

Nakuha sa crime scene ang tulo ka basiyo sa kalibre .45 nga gituohang gikan kini sa armas sa wala hiilhing mga mamumuno.Wa pa matino ang motibo sa maong pagpatay.  (BANAT NEWS)