Menor nga nangawat sa transmitter site napusilan
CEBU, Philippines - Nalandig sa tambalanan ang usa ka 15-anyos nga bayong-bayong human maigo sa splinter sa bala sa shotgun dihang nagpabuto ang gwardiya sa transmitter sa DYRC –Radyo Calungsod kagahapon sa kaadlawon diha sa Sitio Kilawan, Barangay Tanke, dakbayan sa Talisay.
Ang maong menor de edad kinsa naigo sa splinter sa bala sa shotgun sa walang bahin sa iyang ulo daling gidala ngadto sa Talisay City District Hospital ug gibalhin kini ngadto sa Vicente Sotto Memorial Medical Center.
Ang nahisgutang gwardiya nga nagpabuto mao si Nestor Dalnay, sakop sa Planet Earth Security Agency (PESA) kinsa gipaabot pa sa kapolisan nga moanha sa Talisay City Police Station aron kini mapaubos sa imbestigasyon.
Si SPO1 Mikie Espina nga nahinabi sa Banat News nagkanayon ang menor dunay laing kuyog nasakpang misulod diha sa compound sa transmitter sa nahisgutang estasyonan sa radyo hinungdan gipabuthan kini ni Dalnay sa iyang service firearm nga 12 gauge shotgun.
Matud ni Espina nga ang mga kaubang gwardiya ni Dalnay mipasangil nga ang menor nanguha og mga kable, na-recover gikan sa posisyon sa maong menor ang mga copper ug bronze wires sa transmitter.
Si Espina mibutyag nga kanunay silang makaresponde sa maong dapit tungod sa kaso sa pagpangawat sa mga gamit sa maong transmitter site.
Ang station manager sa DYRC –Radyo Calungsod nga si Niño “Bonito†Padilla mibutyag sa Banat News nga sukad niadtong tuig 2010 naalkanse na sila og P5 milyones tungod sa mga pagpangawat sa ilang “radial and groundings.â€
Matud ni Padilla nga sa milabay’ng tuig duha ka semanang wala makatingog ang DYRC tungod kay gikawat ang radial and groundings hinungdang mi-pullout ang mga commercials ug blocktimers.
Ang radial and groundings adto paliton sa Taiwan nga ginama sa copper nga tag P2,000 ang metros, apan sa ilang nasayran nga putol-putolon kini ug ibaligya lang og P20 matag kilo sa mga junkshops. Gibutyag usab ni Padilla nga sa iyang nadawat nga report gikan sa supervisor ni Dalnay nga “self defense†ang nahitabo tungod kay giingong gipusil sa grupo sa maong menor de edad ang gwardiya.
Matud ni Padilla nga sa ilang kontrata ang security agency ang manubag sa bisan unsang butang nga mawala diha sa transmitter. Gihangyo ni Padilla ang security agency nga pasurenderon si Dalnay, apan nasayran nga mo-pullout na ang PESA ug mohangyo siya sa kapolisan sa siyudad nga visible unta kini diha sa lugar samtang nangita pa sila og laing security agency. (BANAT NEWS)
- Latest
