Caña mibuhis sa iyang kinabuhi vs illegal drugs

CEBU, Philippines -  Gihulagway nga usa ka tarong nga polis ang hepe sa Ubay Police Station nga gi-ambush patay niadtong Sabado sa gabii, Hunyo 7, nga si Chief Inspector George Caña.

Kini ang gipamahayag ni Chief Inspector Noli Cernio ang hepe sa Theft and Robbery Section (TRS) sa Cebu City Police Office (CCPO) nga nahinabi sa Banat News.

Matud pa ni Cernio nga iyang batch si Caña sa pagsulod niini sa Philippine National Police (PNP) .

Sumala pa ni Cernio nga iyang suod nga higala ang namatay nga opisyal kay nagsunod sila pirme og lingkoranan gumikan pulos nagsugod sa letter “C”  ang ilang mga apelyedo. Nagkauban ‘sab sila og assignment sa Siquijor, diin si Caña maoy Chief for Administration samtang si Cernio maoy Chief for Operations.

Matud pa ni Cernio nga katapusan niya nga naestorya si Caña pipila ka bulan pa lang ang milabay atol sa usa ka seminar nga gihimo dinhi sa Sugbo.

Sumala pa niya, gusto na untang magpabalhin dinhi sa Cebu si Caña sa sunod tuig.

Si Cernio miingon hugot gyud sa iyang kampanya batok ilegal nga drugas sa iyang area of responsibility si Caña  ug makadaghang higayon na niya kining gitambagan nga magbantay kanunay gumikan sa posibilidad nga daghan na nga mga druglord nga nasuko kaniya.

Gani gikomedyahan pa siya ni Caña nga nakapalit na kini og bulletproof alang sa iyang proteksyon.

“Kabalo man g’yud ko nga dili man g’yud to modawat og suhol, gusto man g’yud to niya nga limpyohan g’yud niya ang iyang lugar, ako na lang siya nga gitambagan nga mag-amping lang siya,” matud pa ni Cernio.

Apan niadtong Hunyo 7 sa gabie, pasado alas-8, usa ka mensahe sa text ang iyang nadawat nga nagpahibalo kaniya sa pag-ambush patay ni Caña.

Si Cernio mihulagway nga daku nga kawad-on sa Bohol  ang kamatayon ni Caña kay dili kini mahadlok sa pagpatuman sa iyang trabaho.

Nasayran ‘sab sa Banat News nga pipila ka semana sa wala pa gi-ambush si Caña, nahinabi pa kini sa usa ka lokal nga radio station sa Bohol diin gibutyag niini nga andam niya nga ibuhis ang iyang kinabuhi, aron malimpyo lang sa drugas ang iyang lugar.  (BANAT NEWS)