Duha gipamusil patay

CEBU, Philippines - Duha ang patay sa duha ka pagpamusil sa managlahing lugar sa probinsya sa Sugbo, usa sa lungsod sa Balamban ug usa sa lungsod sa Consolacion.

Maayong pagka-kagay sa ulo sa usa ka mag-uuma sa lungsod sa Balamban human kini gipusil ka-upat ka higayon tumong sa iyang ulo, pasado alas-8 sa buntag niadtong Domingo diha sa iyang umahan sa Sitio Lantawan, Barangay Matunog, Balamban.

Giila ang biktima nga usa ka Joel Capangpangan, 35, nagpuyo ra sab sa maong lugar. Sumala pa ni SPO1 Rañelito Villarino sa Balamban Police Station nga nahinabi sa Banat News nga duha ka mga tawo nga nagsakay sa motor ang mipusil sa biktima ug pagkahuman gipasalbahan ang mga estambay sa naagiang tindahan sa ilang pag-ikyas.

Nakuha gikan sa crime scene ang unom ka basiyo sa .45 caliber pistol nga gituhoan nga gigamit sa mamumuno ug usa ka deformed slug sa agtang sa biktima.

Samtang sa lungsod sa Consolacion patay sab ang usa ka Godfrey Glabol, 35, minyo nga nagpuyo sa Barangay Pulpogan, Consolacion, human kini gipusil sa makadaghan nga higayon duol sa iyang panimalay.

Matud pa ni PO1 Gypsy Miro sa Consolacion Police nga  nagbarog ang biktima daplin sa dalan dihang gipaulanan og bala sa duha ka mga lalaki.

Walo ka basiyo sa .40 caliber nga bala ang nakuha sa crime scene, wala pa maestablisar sa kapolisan ang motibo sa maong pagpatay.  (/EIM)(BANAT NEWS)