Brgy hall sa Sapangdaku klasehan

CEBU, Philippines - Kapin sa 500 ka tinun-an sa Sapangdaku Elementary School sa dakbayan sa Sugbo ang temporaryong ibalhin sa Barangay Hall.

Kini samtang tukuron pa ang bag-ong school building diin luwas ang mga tinun-an.

Matud ni Lorna Damalerio, barangay kapitan sa Sapangdaku, nga mahimong magamit ang ikatulo ug ikaduhang andana sa barangay hall.

Sa ikatulong andana masulod ang duha ka dagkong classrooms nga mokabat sa 80 ka tinun-an.

Sa ikaduhang andana masulod usab ang duha ka gagmay’ng classrooms.

Ang ubang tinun-an nga dili na maigo sa barangay hall mahimong makagamit sa mga tulda nga pabarugon sa barangay.

Gipasalig sa kapitan nga makagamit ang mga tinun-an sa barangay hall hangtud mahuman ang bag-o nilang building.

Si Cebu City Michael Rama mitahas kang Bise Mayor Edgardo Labella sa pag-facilitate nga madeklarar ubos sa state of calamity ang Sapangdaku aron makagamit sa calamity fund sa pagpatukod sa tunghaan.

Samtang gipadayon usab ang pagsusi sa mga gikinahanglan sa Busay Elementary School.

Matud ni DepEd Cebu City district superintendent Rhea Mar Angtud nga padayon ang klase sa Busay sa kondisyon nga ipadali ang pagsusi sa kalig-on sa ilang building.

Dugang ni Angtud nga kun morekomendar og retrofitting ang City Engineer human sa pakisusi, mangita sila og paagi sa pagbalhin sa mga tinun-an. (/GMR)(BANAT NEWS)