Sudanese angol sa bangga sa motorsiklo

CEBU, Philippines - Nalandig sa tambalanan ang usa ka Sudanese human nakasugat og aksidente sa kadalanan alas 4 sa kaadlawon sa may M.J Cuenco Avenue eskina Hipodromo, dakbayan sa Sugbo.

Ang langyaw nailhan nga si Eyad Alsiddiq Abdullah Abdulmajeed, 22, ulitawo ug temporayong nagpuyo sa sitio Lumboy, Banawa, dakbayan sa Sugbo.

Samtang ang gika-ingkwentro sa langyaw mao si Ronald Sabao, 43, minyo, taga Poblacion, lungsod sa Consolacion.

Sa imbestigasyon sa traffic division nasayran nga sakay sa tagsa-tagsa ka motorsiklo ang duha subay sa managlahing direksyon.

Paghiabot sa nahisgutang lugar nahitabo ang panagbangga sa duha ka motorsiklo hinungdan sa pagkalagpot sa mga biktima ug nangalukot diha sa karsada.

Ang mga nakakita sa panghitabo ang daling mitabang ug gidala ang duha sa tambalanan. Gipaubos sa liquor test ang duha ug nasayran nga positibo sa alkohol ang langyaw. Gikatakdang pasakaan og kaso ang maong Sudanese gumikan sa pagmaneho nga ubos sa impluwensiya sa ilimnong makahubog. (/GMR)(BANAT NEWS)