Mga polis pasayohon sa mga help desks

CEBU, Philippines - Gimandoan sa direktor sa Cebu City Police Office ang iyang mga sakop nga kinahanglang mosayo sa pag-duty sa mga lugar nga duna’y police help desk nunot sa pagsugod na sa klase.

Matud ni CCPO Director Noli Romana nga kinahanglang dili ulahi nga moabot ang mga polis kay sa mga estudyante sa mga tunghaan. Buot si Romana nga sa dili pa ang alas 6 sa buntag, anaa na sa mga police help desk ug sa mga lugar nga dapat sila mopuwesto aron pagseguro sa pagbantay sa mga tinun-an.

Apil sa gitutukan sa kapolisan sa dakbayan sa Sugbo ang mga dagkung tunghaan nga posibling magduot ang mga tinun-an.

Samtang gipasabot usab sa kadagkoan sa City Traffic Operations and Management (CITOM) nga ila usab prayoridad ang mga tunghaan nga daplin sa karsada aron maseguro nga dili maghuot ang dagan sa trapiko.

Giawhag sa operations officer sa CITOM Joy Tumulak ang mga motorist nga kinahanglan nga naa sa kondisyon ang mga sakyanan nga ilang gamiton aron dili makamugna og kahuot sa dagan sa trapiko kung madautan diha sa karsada. (/GMR)(BANAT NEWS)