Motorista mireklamo

CEBU, Philippines - Daghan nga mga motorista mireklamo kabahin sa mga sakyanan nga magparada daplin sa karsada sa Natalio Bacalso Avenue habig sa dakbayan sa Talisay samtang ang mga drayber mokaon sa duol nga mga karenderiya.

Natan-aw sa maong mga motorista ang dako’ng risgo sa gihimo sa mga PUJ drivers ug uban nga tag-iya og laing mga sakyanan nga giparada nila ang ilang sakyanan daplin sa karsada kay hayan makamugna kini og disgrasya.

Ang mga kawani sa Public Information Office (PIO) sa dakbayan sa Talisay mibutyag nga ubay-ubay na nga reklamo kabahin niini ang ilang nadawat. Gani ang maong reklamo napaabot na ngadto sa senior secretary ni Mayor Johnny De los Reyes nga si Solomon Paypa. Si Paypa sa iyang bahin, nagkanayon nga ipaabot niya sa City Peace and Order Council (CPOC) ang nahisgutang problema aron kini mahisgutan ang paghatag og aksyon.

Matud ni Paypa nga adunay national law nga nagdili sa pagparada og sakyanan diha sa mga national highway. Ipatawag ni Paypa ang atensiyon sa mga traffic enforcers sa Talisay aron mopahigayon og operasyon batok sa mga sakyanan nga magparada sa national highway.

  Subay usab niini, si Jane Enrile nga maoy hepe sa licensing office sa Talisay City Hall nagkanayon nga ubay-ubay sa mga karenderiya sa siyudad ang wala makalukat og business permit.  (BANAT NEWS)