Pagatpat dako og tabang sa mga mananagat

CEBU, Philippines - Ang Department of Environment and Natural Resources (DENR)-7 mibutyag nga gawas sa pagpugong sa dagkung bawod ang mga Pagatpat nga gipananom sa usa ka ektaryang gilapdon sa lapyahan nakatabang sa mga mananagat diin mikabat ngadto sa usa ka toneladang isda ang ilang makuha matag tuig.

Si DENR Executive Director, Isabelo Montejo nagkanayon nga ang mga Pagatpat nga gipangtanom sa nagkalain-laing sektor sa katilingban nakahatag kini og food security ug panginabuhian sa mga mananagat.

Gipasabot ni Montejo nga ang mga isda anha mopasilong ug mangitlog sa Pagatpatan. Base sa pagtuon sa DENR-7 Regional Technical Director for Ecosystem Research and Development Services nga si Emma Melana nasuta nga dunay 47 ka matang o klase sa Pagatpat ang nabuhi karon nganhi sa Central Visayas. Sa usa ka ektaryang plantasyon sa Pagatpat mikabat ngadto sa 1.08 toneladang gidaghanon sa mga isda ang nakuha sa mga mananagat matag usa ka tuig. Gawas niini ang maong mga Pagatpat sarang na kining makapugong sa dagkung mga bawod.

Human sa gibiling kadaot sa bagyong Yolanda  sa Central ug Eastern Visayas nagkadaghan na usab ang mga grupo nga misuporta sa pagpalapad sa proyekto sa DENR kabahin sa pagpananom og mga Pagatpat diha sa mga lapyahan.

Apan bisan pa niini matud ni Montejo ang ilang buhatan nagpadayon gihapon sa kampaniya ug pag-edukar sa mga tawo kabahin sa  ka importante sa pagtanom og mga Pagatpat.  (BANAT NEWS)