Earthquake drills hingusgan

CEBU, Philippines - Gawas sa fire drills sa Bureau of Fire and Protection (BFP) Central Visayas, ang Office of Civil Defense (OCD-7) nipahibawo nga mopahigayon usab sila og earthquake drills sa mga pampublikong tulonghaan dinhi sa Sugbo.

Ang buhatan ni OCD-7 Regional Director Minda Morante nipahibawo nga angayan nga makat-on ang mga tinun-an ug mga magtutudlo sa husto nga buhaton sa higayon nga motay-og ang linog.

Kini aron masiguro nga kalmado ug dili mangaratol ang mga tinun-an ug mga magtutudlo nga anaa sa eskuylahan ilabina sa mga tag-as nga school buildings. Gipahibawo niini nga importante kaayo ang earthquake drills sa tulunghaan tungod usab sa grabeng epekto sa 7.2 magnitude nga linog nga nitay-og sa Bohol niadtong niaging tuig.

Hinuon ang OCD nakig-alayon na sa mga kadagkuan sa Department of Education (DepEd-7) alang sa katumanan sa naasoy nga earthquake drills sa mga eskuylahan niining school year 2014-2015. (BANAT NEWS)