Tipdas kuyaw makatakod
CEBU, Philippines - Gitutukan karon sa Department of Health ang pagtumaw sa pipila ka kaso sa sakit nga tipdas didto sa pipila ka mga lungsod sa lalawigan sa Siquijor.
Si Renan Cimafranca sa Regional Epidemiology and Surveillance Unit (RESU-7) mitug-an sa interview sa usa ka sibyaanan nga may gipadala na nga medical team ang DOH-7 ngadto sa maong lugar.
Nanguha na sila og blood samples gikan sa mga pasyente nga nalandig sa tambalanan ug gipaabot na lamang niini ang laboratory result. Ang DOH-7 nabalaka niining pagtumaw sa sakit nga tipdas tungod kay nagsugod na man ang klase ug posibleng daling mokuyanap ang maong sakit sa higayon nga motungha sa klase ang bata nga may tipdas.
Gipahimangnoan hinuon niini ang mga ginikanan sa bata nga gitipdas nga dili una paeskuylahon ang mga bata aron dili kini makatakod ngadto sa laing mga bata. (BANAT NEWS)
- Latest
