Sikyu nanglungkab, laing guwardiya gidisarmahan

CEBU, Philippines - Usa ka security guard ang gipangita  karon nga maoy gipasanginlang  miunay og lungkab sa establisamento nga iyang gibantayan sa dalan Leon Kilat sa dakbayan sa Sugbo. Ang suspetsado naila nga si Henry Sari, sakop sa E&R Security Agency, night shift nga guwardiya sa Gochan building. Base sa imbistigasyon ni PO3 Antonio Tejero sa Carbon Police nga nahinabi sa Banat News nga ang suspetsado duha pa lang ka adlaw nga nadestino sa maong building.

Sumala pa ni Tejero, si Sari maoy gipuli sa kanhi guwardiya sa maong building nga giaresto tungod sa aksidenteng pagbuto sa armas niini.

Matud pa nga nahanaw ang kapin sa P60 mil nga cash gikan sa Aljuns Store nga tindahan og spare parts, sumala pa nga dunay nakakita nga may kauban si Sari nga  usa usab ka guwardiya ug  may mga kauban nga mga babaye atol sa paghimo sa pagpangawat. Giingong sa pultahan sa luyo sa building miagi ang mga suspetsado nga duol ra kaayo sa pwesto ni Sari. Gisuwayan nila pagpangita ang maong gwardiya apan wala kini mopatim-aw.

Sa laing bahin, usa ka guwardiya sa Star Oil Gasoline Station diha sa Cebu South Coastal Road habig sa Barangay Cansojong, dakbayan sa Talisay ang gidisarmahan sa duha ka tulisan niadtong Biyernes sa ala 9:45 sa gabii.

Ang duha ka kawani sa maong gasoline station nga sila si Jay-Ar Abarquez ug John Ronal Panilagao mao nay mi-report sa hitabo ngadto sa Talisay City Police Station.

Sila si SPO1 Mikie Espina, SPO1 Yvonne Illustrisimo ug PO1 Stephen Sefuesca ang daling miresponde sa maong report ug nasayran nga duha ka wala mailhing lalaki  nga parehong armado ug sakay sa usa ka kolor itom nga motorsiklo ang kalit lang mitungha ug mition sa ilang armas ngadto sa guwardiya nga si Ricson Laurena, 31.

Si Laurena nga sakop sa Bisda Security Agency gidisarmahan sa iyang shotgun nga dunay serial number nga 979909 ug pagkahuman gitulis ang kahera nga si Wilmar Menchavez Andrade. Nadala sa mga tulisan ang halin ni Andrade nga P7,029. Base sa nakuhang footage sa Close Circuit Television (CCTV) cam ang mga tulisan nagsul-ob og mga close-type helmets.  (BANAT NEWS)