Usa ka sakong bala nakawtan
CEBU, Philippines - Usa ka sakong bala sa garrand rifle ang nakubkoban sa bakanteng luna sa sitio Tabok Lamac, Yati, Liloan alas 3 sa hapon niadtong Huwebes.
Si PO3 Jesson Gayo miingon nga ang tag-iya sa luna nga si Danny Bañez nga nagpahawan sa luna aron himoong garden maoy nagpahibalo ngadto sa ilang buhatan.
Usa ka Arnel Francis Villamor, nagpuyo sa maong lugar, ang nakadiskubre sa maong mga bala sa pagkawot niini sa yuta.
Dugang pa ni Gayo nga mohimo pa sila og dugang pakisusi sa maong dapit sa pagsuta kun may lain pang mga bala nga gilubong sa maong dapit.
Daku ang ilang pagtoo nga gilubong ang maong mga bala panahon sa ikaduhang gubat sanglit sagad sa mga naggamit niini mao ang mga beterano sa gubat.
Nagtoo usab ang kapolisan nga moboto pa ang maong mga bala.
Itugyan ngadto sa Central Command ang mga bala alang sa tukmang paghipos niini. (/GMR)(BANAT NEWS)
- Latest
