Dugang 3 ka adik nga brgy workers
CEBU, Philippines - Miabot na og 107 ka kawani sa barangay dinhi sa dakbayan sa Sugbo nga napositibo sa kinalit nga drug test ug nasakpan nga sila mga adik sa gidili nga matang sa drugas.
Usa ka kawani sa Barangay Adlaon, bukid nga bahin sa dakbayan sa Sugbo, ang labing ulahi nga napositibo sa shabu diha’ng gi-drug test sa mga sakop sa City Office for Substance-Abuse Prevention (COSAP) ang 59 ka opisyal ug kawani sa mao nga barangay.
Matud ni COSAP chief Alice Utlang nga adunay duha ka kawani sa Adlaon nga wala na lang nila giapil pag-drug test kay mga tiguwang na ug gani ang usa dako nga masakiton ug gi-dialysis na.
Kaniadto’ng Miyerkules, duha usab ka kawani sa Barangay Pahina-San Nicolas – usa ka loader sa mga basura ug drayber --ang napositibo ‘sab sa ilegal nga drugas.
Ang mga kapitan sa mao nga mga barangay mao gayud ang miawhag sa COSAP nga himoan og drug test ang ilang mga opisyal ug kawani aron pagsuta kinsa kanila ang adik sa ilegal nga drugas. (BANAT NEWS)
- Latest
