Lalaki gipusil, laing usa giluba

CEBU, Philippines - Nabuslot ang tuong tampihak sa usa ka tawo nga gipusil sa wala mailhing mamumuno nga nagsakay og motorsiklo sa Sitio San Roque, Barangay Lamac, lungsod sa Consolacion alas-12 pasado kagahapon sa kaadlawon.

Ang biktima nga si Julie Jollen Chutipa, 36, taga Barangay Yati, Lungsod sa Liloan nagbarog lang sa daplin sa karsada dihang kalit gisakdapan sa motorsiklo nga giluwanan sa duha ka tawo ug gidul-itan ug gipusil sa backrider sa sumbohan sa armas ang tampihak sa biktima.

Si SPO1 Francisco Perez  Jr. sa Consolacion Police Station miingon pulos nagsuot og helmet ang  duha ka lalaki nga nipatay sa biktima.

Dali nga gihatod sa mga sakop sa pamilya ang biktima ngadto sa Vicente Sotto Memorial Medical Center sa dakbayan sa Sugbo.

Samtang grabe usab nga naangol si  Tito Judaya, 43, human kini gidunggab sa silingang si Dario Garbo, 28, silingan sa biktima diha sa Barangay Calero, sa lungsod sa Liloan. Ang suspetsado nga nahinabi sa  Banat News miingon nga gipasanginlan siya sa biktima nga maoy nagbato kang Judaya sa iyang pag-agi sa maong dapit.

Gipanghimakak ni Garbo ang maong pasangil ngadto kaniya hangtod nga nagkasinukmagay sila ug nakapunit kini og kutsilyo nga maoy iyang gigamit pagdunggab sa luyo sa biktima. (BANAT NEWS)