Suspetsadong carnapper nasikop
CEBU, Philippines - Usa ka suspetsadong carnapper ang nasikop sa gipahigayong follow-up nga imbestigasyon sa kapolisan kabahin sa report nga dunay nagpabuto og pusil niadtong Miyerkules sa hapon sa Sitio Mananga 2, Barangay Tabunok, dakbayan sa Talisay.
Ang nasikop mao si Jimmy Heruela, 20-anyos, taga Villa Bulsita, Barangay Bulacao, dakbayan sa Sugbo apan giingong anha magpundohan sa Sitio Mananga.
Si Heruela giingong naabtan nila ni Insp. Rodegen Fudotan, PO3 Ferdinand Pablo, PO3 Benedicto Lasque ug PO2 Edwin Campomanes nga nagtakin sa iyang hawak og pusil.
Naimbargo sa mga polis gikan sa posisyon ni Heruela ang usa ka kalibre .45 nga pistola nga dunay usa ka magazine ug lima ka bala.
Ang suspetsado wala makapakita og dokumento sa maong armas hinungdang gisikop sa mga polis.
Si Pablo nga nahinabi sa Banat News kagahapon mibutyag nga si Heruela suspetsado sa ubang mga insidente sa carnapping sa Talisay.
Matud ni Pablo nga kaniadto nga 17-anyos pa lang si Heruela nasikop nila kini tungod sa kasong theft ug robbery. Si Heruela nagtingkagol karon sa Talisay City detention cell. (BANAT NEWS)
- Latest
