Selosong mipatay sa kapuyo ug igsuon gikasohan
CEBU, Philippines - Gipasakan na og kasong illegal possession of firearms kagahapon si Flint Toling ang suspek nga miunay og patay sa iyang kapuyo ug igsuon sa Sector 6, Barangay Pagsabungan siyudad sa Mandaue niadtong Miyerkules sa buntag tungod sa grabeng selos.
Matud sa kapulisan sa Basak Police Station nga wa pay nipatim-aw nga kabanay sa mga biktima aron mapasaka na ang kasong 2-counts of murder.
Ang kabanay usab ni Asehla Antipuesto nga kapuyo sa suspek gipaabot nga karong adlawa moabot gikan sa Mindanao aron masang-at na ang kasong pagpatay.
Unang mibutyag ang kabanay sa suspek nga desidido gyud sila nga kasohan ang suspek.
Kahinumduman nga ang suspetsado mipusil sa iyang kapuyo makaduha ka higayon ug dihang iyang nakita nga naglihok pa kini gidunggab kini sa suspek nga miresulta sa kamatayon ni Antipuesto.
Lakip usab sa gipusil patay sa suspek ang iyang igsuon nga si Jason kinsa naglingkod lang sa parkingan sa mga habal-habal. Selos ang gituohan sa kapulisan nga motibo sa krimen tungod sa pagduda nga adunay relasyon ang duha. (BANAT NEWS)
- Latest
