Duha ka barangay problema sa drugas
CEBU, Philippines - Duha ka barangay sa dakbayan sa Sugbo nga ubos sa Talamban Police Station ang gimonitor labot sa problema sa ilegal nga drugas.
Matud ni Senior Insp. Bienvenido Miral, hepe sa Talamban Police Station, nga ang mga barangay mao ang Pulang Bato ug Budlaan.
Plano ni Miral ang pagpahigayon og checkpoint paingon sa nahisgutang mga lugar.
Upat ka grupo ang giingong naglihok sa lugar.
Matud ni Miral nga dunay mga spotters ang mga drug pushers nga maoy mopahibalo sa ilang mga kauban kung may mopadulong na nga mga polis sa lugar.
Gani giingong may teleskopyo pa ang uban sa pag-monitor sa mga polis.
Gisubay usab ang taho nga adunay mga polis nga mag-adtoan sa lugar ug magpangayoan og kwarta sa mga drug pushers.
Ang ka daku sa ilang area of responsibility ang usa sa gitumbok ni Miral nga hinungdan nga maglisud sila sa pag-monitor sanglit sakop nila ang 17 ka barangay samtang 52 ka polis lang ang iyang sakop. (BANAT NEWS)
- Latest
