“Tulis Me” nasakpan, P1.5M alahas nabawi

CEBU, Philippines - Kaso sa “tulis me” nasakpan, usa ka babayeng appraiser sa usa ka pawnshop sa Freedom Park sa Barangay Ermita ning dakbayan sa Sugbo gitanggong sa kapolisan human nabisto ang iyang gibuhat.

Ang nadakpan mao si Grace Jasangas, 24, nga appraiser sa Diner Pawnshop and Jewelries sa maong dapit.

Matud pa ni Senior Inspector Noel Lomente ang hepe sa Station 5, Carbon Police, unang midangop sa ilang buhatan si Jasangas niadtong Martes sa buntag ug misumbong nga gitulis ang ilang prendahanan sa duha ka mga lalaki.

Apan sa pag-imbestigar sa kapolisan, walay bisan usa sa mga katupad nga establisamento ang nakabantay nga dunay susamang hitabo sa ilang dapit hinungdan nga nagduda ang kapolisan.

Nasayran usab gikan sa tag-iya nga duna untay himuong imbentaryo ang pawnshop nianang adlawa apan wa mahinayon tungod sa gibuhat ni Jasangas.

Nagduda usab ang tag-iya sa maong pawnshop tungod kay nakadawat sila’g impormasyon nga adunahan na si Jasangas didto sa ilang probinsya sa M’lang, North Cotabato human nakapalit og mga humayan, nakapatukod og balay ug may sakyanan.

Sa pagsukit-sukit sa suspek, miangkon kining duna kini kakunsabong mga lalaki ug miboluntaryong iuli ang maong mga alahas nga ibilin lang sa usa ka dapit sa Bliss, Labangon.

Tuod man nabawi sa kapolisan ang maong mga alahas nga gisud sa usa ka baso ug giputos og panapton apan wa na diha ang duha ka kakunsabo niining mga lalaki.

Na-recover sa kapulisan ang 54 ka mga gold rings, 41 ka paresan nga gold earings, 1 ka walay pares nga earings, usa ka peke nga earing, 14 ka gold necklace, tulo ka gold bracelet, usa ka bungled gold bracelet ug 10 ka gold pendant nga mikantidad tanan og P1.5 milyon.

Dako ang pagduda sa tag-iya nga daghan na kining nakawat nga mga alahas sukad sa pagtrabaho niini niadtong tuig 2009. (BANAT NEWS)