Duha gipatay tungod sa selos

CEBU, Philippines - Tungod sa selos gipatay sa usa ka lalaki ang iyang kapuyo nga gituohang mabdos ug gisunod niini pagpatay ang iyang maguwang tungod sa pagduda nga ang duha dunay relasyon.

Ang insidente nahitabo sa Sector 6, Barangay Pagsabungan  sa Dakbayan sa Mandaue kagahapon sa buntag. Ang mga biktima naila nga sila si Ashela Antipuesto, 31, usa ka call center agent ug Jason Toling, 35, pulos nagpuyo sa maong barangay.

Si Antipuesto kapuyo sa suspek nga si Flint Toling, 28, nga usa ka drayber sa habal-habal nga nasikop sa kapolisan human sa krimen.

Nasayran nga si Antipuesto ug ang suspek nga si Toling nagpuyo sa usa ka apartment sud na sa duha ka semana apan matud sa landlady kanunay na lang mag-away ang duha tungod sa pangabubho.

Gani ang silingan sa duha nga si Alex Tubod miingon nga wala sila magdahom nga mabuhat sa suspek ang maong krimen tungod kay human nila madungog ang panag-away sa duha nakit-an  nila ang suspek nga kalma rang milakaw paingon sa eskina ug didto gipusil niini iyang igsuon.

Si Senior Inspector Genilo Veraque, hepe sa Basak Police Station mibutyag nga ang suspek nagselos sa iyang kapuyo ug sa iyang igsuon tungod sa pagduda nga dunay relasyon ang duha.

Sa wala pa mahitabo ang krimen giingong nag-away ang duha niadtong Martes sa gabii ug kagahapon sa buntag naglalis na sab sila’g balik dihang molakaw unta ang biktima nga miresulta na hinoon sa maong krimen.

Ang suspek sa iyang bahin miangkon sa gihimong krimen ug kini midugang nga nagduda siya nga dili siya maoy amahan sa gisabak sa iyang kapuyo kay matud pa niya dili kini makaanak.

Nasakmit sa kapolisan ang usa ka kalibre .38 uban sa puan sa naputol nga kutsilyo nga ang kaputol gituohang nag-ungot pa sa lawas sa kapuyo niini.

Ang maguwang sa suspek nga si Jason gidala sa Mandaue District Hospital apan namatay usab kini. Ang igsuon niini nga si Vincent  mibutyag sa Banat News nga wala siya magdahom nga mahimo kadto sa iyang igsuon.

Hugot hinoon ang ilang desisyon nga ilaha gyud nga pasakaan og kaso aron mahataga’g hustisya ang ilang maguwang. (BANAT NEWS)