Namaligya’g shabu duol sa CCPO nadakpan
CEBU, Philippines - Drug pusher nga namaligya og shabu duol sa Cebu City Police Office nadakpan sa gihimong buy-bust operation kagahapon sa buntag atol sa operasyon sa mga sakop sa City Intelligence Branch (CIB).
Giila ang gipasanginlang level 2 drug pusher nga si Roel Laborte, 46, taga 143 C, Gorordo Avenue, Purok 3, Kamputhaw, Cebu City, tabok lang sa karsada duol sa CCPO. Duha ka semana na ang nakalabay human nakadawat og impormasyon ang CIB kabahin sa operasyon ni Laborte hinungdan sa gihimong surveillance kaniya.
Matud pa ni Sr. Insp. Gomercindo Mandaue naglisod pagsikop ni Laborte gumikan kay sudlonon ang maong lugar ug duna kini mga lookouts.
Nakuha sa posesyon ni Laborte ang 21 ka pakete sa gituhoang shabu nga kantidad og tag P1,000 ang usa, usa ka medium sized ug large sized pack , nga mikantidad tanan og P70 mil.
Matud pa ni Mandaue nga daku nga insulto sa kapulisan kay sa likod lang sa CCPO mihimo sa ilegal nga buhat ang suspetsado.
“Binuang og insulto g’yud ni kay duol ra kaayo sa CCPO, mao nga ato g’yud ning gilihok,†matud pa ni Mandaue.
Ang suspek miangkon hinuon sa iyang salaod kay matud niya tungod sa kalisod sa kinabuhi karon maong namaligya siya niini. (BANAT NEWS)
- Latest
