Survey sa mga sinkholes sa Bohol padayon

CEBU, Philippines - Padayong mihimo sa ilang ground penetrating radar survey ang Mines and Geosciences Bureau sa probinsiya sa Bohol aron pagsusi sa dugang sinkholes nga namugna ilabi na nagpadayon pa ang mga aftershocks sa lugar.

Matud ni Al Emil Berador, chief geologist sa MGB-7, nga aduna silay team nga gipadala nga maoy misusi sa mga sinkholes nga namugna tungod sa 7.2 magnitude nga linog.

Gidugang ni Berador nga wala pa silay nadawat nga report mahitungod sa resulta sa gihimong assessment sa pipila ka mga lugar.

Nasayran nga kapin sa 40 mil ka housing sites gikan sa 17 ka lungsod sa Bohol ang gihangyo nga ipaubos sa Core Shelter Program Assessment ug kapin pa lang sa 5,000 ang na-assess sa MGB-7.

Ang Department of Education (DepEd) mihangyo usab sa MGB-7 nga susihon ang kapin sa 6,000 ka mga tunghaan sa Bohol,  apan wala pa kaabot sa 50 porsiyento ang nasusi.Gihimong prayoridad ang Bohol tungod sa kadaut nga naangkon mugna sa linog nga miigo niadtong Oktobre 15 sa miaging tuig.

Gani adunay rekomendasyon nga pipila ka mga tunghaan sa Bohol ang dili una gamiton tungod kay delikado ug posibleng mabutang sa risgo ang kinabuhi sa mga estudyante ug sa mga magtutudlo. (BANAT NEWS)