Help Desk sa kapolisan sa Mandaue way nagbantay

CEBU, Philippines - Ang officer in charge sa Police Regional Office 7 gusto nga paesplikahon ang mga station commanders sa Mandaue City Police Office human naaktohan nga walay mga polis diha sa ilang mga police help desk sa mga tunghaan.

Si Senior Superintendent Orlando Ualat nasagmuyo sa hepe sa MCPO Police Station 1 ug 2 kay dihang iyang giinspeksyon ang ilang help desks sa mga eskwelahan nga sakop sa ilang hurisdiksyon way nagbantay. Ang maong mga police help desks nga way nagbantay gipahimutang sa Mandaue City Central School ug Subangdaku Elementary School.

Pasado alas-6 sa buntag kagahapong adlawa, surpresa nga nag-inspeksyon si Ualat sa maong mga tunghaan kay gusto niini nga makita og unsay gihimo sa kapulisan sa maong lugar, apan siya na hinoon ang nasurpresa kay mingaw ang maong lamesa.

Sa pakighinabi sa Banat News sa Station Commander sa Police Station 1, Chief Inspector Jimmy Aguisanda, kini mitug-an nga wala kini problema kung gusto sa ilang opisyal nga wala pa’y alas 6 sa buntag atoa na sa lugar ang mga polis. Gani matud pa nga iya na nga gisultihan ang iyang mga sakop nga magsayo na kini sa ilang duty.

Samtang sa kabahin ni Senior Inspector Miguel Andesa ang Station Commander sa Police Station 2, mipasabot nga sa ilang naandan sa nakalabay nga tuig alas- 7 na sa buntag moadto ang polis sa mga police help desk ug mohawa ‘sab pagka alas-8 kun magsugod na ang klase sa mga bata.

Nasayran nga alas-6 pa sa buntag magsugod na og pangabot ang mga bata kay alas-7 sa buntag magsugod na ang klase, ug kun mangabot ang mga polis ug alas-7 wa na silay buhaton pa. (BANAT NEWS)