Class opening generally peacefull–PRO7

CEBU, Philippines - Gihulagway nga generally peaceful ang pagsugod sa klase kagahapong adlawa, dinhi sa dakbayan ug probinsya sa Sugbo.

Kini ang gibutyag ni Senior Superintendent Orlando Ualat ang Officer In-Charge sa Police Regional Office 7 (PRO), atol sa ilang gihimo nga monitoring sa pag abri sa klase.

Apan matud pa ni Ualat nga nasurpresa sila sa gidaghanon sa duot sa mga estudyante sa mga tunghaan tungod kay  nagkulang  hinuon ang mga polis nga ilang gipabantay ilabi na sa mga dagkong tunghaan dinhi sa dakbayan sa Sugbo.

Sa nakuha nga impormasyon sa Banat News, moabot lang sa duha ka polis ang nakadestino sa kada tulunghaan.

Apan nakorihian kini dayon human gimando ni Ualat ang pag deploy sa katunga sa mga personahe sa PRO 7, aron makatabang sa kakulang sa polis nga nagbantay sa mga tulunghaan gumikan sa kadaghan sa mga estudyante.

Atol sa ilang paglibot sa mga nag-unang tunghaan dinhi sa Sugbo, duna sa’y nakita nga problema ang opisyal ilabina sa emergency exits sa tunghaan sa City Central School nga iya na nga gipasa sa Bureau of Fire Protection alang sa dinaliang aksyon.

Samtang nagkadaiya sab ang gibuhat nga paglingaw og information drive sa mga presinto sa kapulisan diha sa mga eskuylahan nga sakop sa ilang hurisdiksyon.

Sa San Nicolas Police Station gilingaw sa mga polis ang mga estudyante sa Gothong National High School , diin usa ka mascot nga polis nga dunay dala nga libro ang misugat sa mga bata.

Samtang ang Fuente Police Station pinaagi ni Chief Inspector Wildemar Tiu mihatag ‘sab sila og mga flyers sa mga ginikanan ug mga bata kung unsay angay nga buhaton sa pagsugod sa klase. (BANAT NEWS)