Mandaue City DepEd modawat og late enrollees

CEBU, Philippines -  Modawat gihapon og mga late  enrollees ang mga elementarya ug sekondarya sa mga publikong tulunghaan sa dakbayan sa Mandaue bisan kun nagsugod na ang klase.

Kini maoy gipadayag ni Benjie Tiongson, ang administrative officer sa Department of Education (DepEd) Mandaue City Division nga nahinabi sa Banat News kagahapon.

Matud pa ni Tiongson nga gihatagan nila og higayon nga makatungha ang tanang kabataan karong tuiga pinaagi sa paglugway sa ilang pagdawat hangtod sa Hunyo 30.

Apan iyang giklaro nga dako kaayo og bintaha kadtong mga bata nga sayo nga ipa-enrol sa ilang ginikanan kay masiguro man nga makabaton sila og libro itandi sa maulahi nga posible pang mahutdan.

Giklaro ni Tiongson nga walay gikolekta ang mga publikong tulunghaan sa dakbayan sa mga bata mao nga dili kini rason aron di nila mapa-enroll ang ilang mga anak. Si Tiongson miingon nga ang karaan nga mga tinun-an nga mosulod sa ilang klase wala usab kinahanglana pa ang pagpa-enrol tungod kay awtomatiko man sila nga gilista ngadto sa sunod nga ang-ang.

Dugang pa niya nga sagad sa maulahi sa pagpa-enroll mao lamang kadtong mga tinun-an nga mobalhin gikan sa laing tulunghaan. (BANAT NEWS)