Disgrasya sa motorsiklo, duha patay

CEBU, Philippines - Patay ang duha ka tawo human ang gisakyang motorsiklo nalamba sa giingong hilan nga dapit sa Barangay Ibo, dakbayan sa Lapu-Lapu niadtong Domingo sa gabii.

Si PO1 Cesar Gabule sa traffic division sa Lapu-Lapu City Police Office (LLCPO) niila sa mga namatay nga sila si Emerald Pantaleon, hingkod, ug John Michael Ramirez, 19, pulos taga Barangay Opao, dakbayan sa Mandaue.

Matud ni Gabule nga si Pantaleon ang nagmaneho sa motosiklo gikan sa ilang panimaye sa Barangay Opao ug padulong sa Barangay Mactan, dakbayan sa Lapu-Lapu.

Gituohang kusog ang dagan sa motorsiklo subay sa dalan M.L. Quezon apan kalit lang nawad-an sa iyang control paghiabot sa giingong hilan nga dapit hangtud nga nalamba sa sementadong karsada.

Grabeng kadaut sa ilang kalawasan ang naangkon hinungdan nga daling gidala sa Lapu-Lapu City Hospital sa mga sakop sa Emergency Rescue Unit Foundation (ERUF) apan gideklarar ang duha nga dead on arrival.

Samtang grabe usab nga naangol ang duha ka motorista dihang ang motorsiklo nga ilang gisakyan kalit lang nagkasungag sa Upper Tabok, dakbayan sa Mandaue alas 3 pasado sa hapon sa mao gihapong adlaw.

Si SPO4 Vicente Benabaye, imbestigador sa traffic division sa Mandaue City Police Office (MCPO) miila sa mga biktima nga sila si Carlo Muñez , 37, taga Barangay Pusok, dakbayan sa Lapu-Lapu ug Efren Impas, 28, taga Barangay Tabok, dakbayan sa Mandaue.

Matud ni SPO4 Benabaye nga padulong sa norte ang motorsiklo nga giluwanan ni Impas ug padulong usab sa Upper Tabok si Muñez apan kalit lang nagkasungag hinungdan sa ilang pagkalamba sa sementadong dalan.

Ang duha daling gidala sa Mandaue City Hospital apan gibalhin sa Vicente Sotto Memorial Medical Center. (BANAT NEWS)