Mga tulisan nagsuyop sikop

CEBU, Philippines - Nasikop sa kapolisan ang ang upat ka notadong tulisan sulod sa usa ka balay suyopanan sa sitio Santa Catalina, Lahug, dakbayan sa Sugbo.

Pasado alas 9 sa gabii niadtong Sabado, daling girespondihan sa kapolisan ang report kabahin sa presensya sa upat ka mga notadong tulisan nga nagsuyop og drugas sulod sa usa ka drug den sa maong lugar.

Si Senior Insp. Hartzel Peter Billedo, hepe sa Mabolo Police Station ug maoy nangulo sa operasyon, miingon nga naaktohan gyud ang upat nga nagsuyop.

Giila ang mga dinakpan nga sila si Jonas Tudtud, 28; taga San Jose, Lahug nga nakuhaan og .38 revolver; unom ka paketeng shabu ug duha ka foil strips; Niño Capareda, 22, sa mao gihapon nga lugar nakuhaan og foil strips, disposable lighter ug rolled tissue paper; Christopher Montero, 24, ug Ian Gabriel, 26, pulos taga Kamputhaw, dakbayan sa Sugbo nga nakuhaan og mga drug paraphernalia.

Matud ni SPO2 Jeffrey Larrobis sa Mabolo Police nga daghan ang nadawat nila nga reklamo batok sa upat ka dinakpan apan dili lang mopadayon og reklamo ang ilang mga mabiktima gumikan kay mahadlok ug ang uban hasolan na sa pagreklamo. Dugang pa ni Larrobis nga pagpanulis ug pagpang-carnap sa Salinas Drive ug IT Park ang mga lugar nga kanunay maigo sa maong grupo.

Gitanggong na sa Mabolo Police Station ang upat ka dinakpan nga gikatakdang pasakaan og tukmang kaso. (BANAT NEWS)