Gigapos, gitulis una gipatay

CEBU, Philippines - Gitulis, gigapos ug gidunggab 20 ka higayon ang usa ka asawa og Overseas Filipino Worker (OFW) sa Upper Sirga, Barangay Buanoy sa lungsod sa Balamban kagahapon sa kaadlawon.

Ang biktima giila nga si Jumalyn Abendan, 40, kinsa kauban sa iyang panimalay ang iyang 14- anyos nga anak babaye kinsa nakakita sa krimen ug nahimong yawe sa pag-ila sa usa sa mga mamumuno nga miresulta sa pagkasikop niini. Ang suspek nga nadakpan diha sa crime scene kay giingong nanguryoso uban sa mga silingan nadakpan ug giila nga si Cesar Dumdum Carmelotes, 43, samtang gipangita pa ang usa ka kauban niini.

Matud pa ni SPO1 Jose Villarino ang imbestigador sa Balamban Police Station nga nahinabi sa Banat News, ala-una sa kaadlawon kalit lang misulod si Carmelotes kuyog sa iyang kauban ug gigapos ang manag- inahan ug gidala sila sa kasilyas.

Sumala pa ni Villarino, ang anak mitug-an nga gipangitaan sila sa mga suspek og kwarta nga gibilin sa iyang papa nga bag-o palang nibalik paingon sa nasud sa Australia. Apan mibalibad ang inahan apan mihulga ang usa ka suspek nga kung dili ihatag ang ilang gipangayo ilang patyon ang iyang anak.

Tungod niini napugos og hatag sa 40 mil ka pesos, laptop ug mahalon nga cellphone ang inahan, apan nangayo pa gihapon og dugang kwarta ang mga suspek, apan wala nay mahatag ang inahan.

Matud pa sa dalagita, nasuko og maayo ang mga tulisan ug diha-diha gidunggab ni Carmelotes si Abendan sa makadaghan nga higayon, hangtod nga kini nakabsan sa kinabuhi. Human niini, daling nanggawas ang mga suspek ug swerteng gibiyaan ang dalagita nga gigapos ug diha-diha misiyagit kini pagpangayo og tabang sa mga silingan.

Sumala pa ni Villarino nga samtang sila nag-imbestigar diha sa crime scene sayo sa buntag, ilang nabantayan ang anak sa biktima nga nalisang ug di gusto mogawas sa ilang balay bisan kuyogan nalang sila paghatud sa lawas sa inahan ngadto sa punerarya.

Sa pagpangutana ni Villarino, ang bata mitug-an nga nakit-an niya kuyog sa mga nanguryoso si Carmelotes hinungdan nga giduol nila ang naulahi ug gipangutana.

Matud pang Villarino, sa pagpangutana palang nila kang Carmelotes nangurog ug nangluspad na kini dayon hinungdan nga ilaha kining gidala sa presinto ug didto pinaagi sa one way mirror positibo kining gitudlo sa bata nga maoy mipatay sa iyang inahan.

“Nag bonet ang iyang kauban, pero kini si Carmelotes ang ulo ra ang gitaptapan ingon sa bata, tan-aw nako ani murag wala pa katugpa sir,” matud pa ni Villarino.

Daku ang pagtoo ni Villarino nga dugay na nga naniid ang mga suspek sa pamilyang Abendan ug gitayming nila ang paglarga sa padre de pamilya duha ka semana na ang nakalabay.

Sa laing bahin, duha ang patay sa managlahing pagpamusil diin ang mga mamumono pulos nagsakay og motorsiklo.

Ang mga namatay giila nga sila si Rodric Cabilao, 40, taga Barangay Guadalupe Cebu, nga gipusil patay kagahapon sa buntag sa V. Rama Avenue, Barangay Calamba, ning dakbayan ug usa ka Raul Engbino, 33, taga Barangay Tunghaan, Minglanilla nga gipusil patay pasado alas 3 sa hapon diha ra ilang lugar.

Sa imbestigasyon sa Homicide Section sa Cebu City Police Office nasayran nga samtang nagsubay sa  dalan V. Rama ang biktima kalit lang usa ka motorsiklo nga dunay sakay nga duha ka lalaki ang kalit lang mipusil kang Cabilao sa makadaghan nga higayon.

Samtang blangko pa sab ang kapulisan sa Minganilla kung unsa ug kinsa sab ang mipusil patay ni Engbino nga nagsakay ‘sab og motorsiklo.

Matod pa ni Senior Inspector Richard Gadingan nga pasado alas 3 sa hapon didto sa barangay Tunghaan, samtang nagbarog ang biktima gawas sa ilang panimalay, kalit kining gipaulanan og bala sa duha ka lalaki nga nakaingon sa iyang kamatayon. (BANAT NEWS)