‘Kriminal’ gipangita sa kapolisan

CEBU, Philippines - Padayon karon nga gipangita sa mga polis ang giingong tulisan nga matud pa miunay og pusil patay sa iyang amigo didto sa dakbayan sa Talisay kay mibalibad nga dili mouban sa lakaw ilang grupo.

Si Talisay City Police Chief Reycel Carmelo Dayon mitug-an nga ang ilang gipangita mao si Jose Emmanuel Richards Corominas nga taga  Barangay Day-as, dakbayan sa Sugbo.

Gipasanginlan si Corominas nga maoy mipatay ni Victoriano Balungkit, 35, nga taga Deca Homes, Minglanilla ug miangol sa laing biktima nga si Jerome Pasolohan, 23, nga taga Ward III, Minglanilla.

Ang pagpamusil nahitabo kaniadto’ng Mayo 8 didto sa Sitio Libo, Barangay Mohon, dakbayan sa Talisay. Una nga giila lang ang nagpusil sa mga biktima nga usa ka “Patsoy,” taga Barangay Day-as. Sa imbestigasyon sa kapolisan nailhan nila ang tinuod nga ngalan sa suspek nga matud pa nalambigit usa og kontrobersyal nga hitabo dinhi sa dakbayan sa Sugbo.

Matud pa nga si Patsoy nasuko dihang si Balungkit mibalibad nga dili mokuyog sa grupo tungod kay paeskwelahon kini sa iyang inahan.

Ang hepe sa Talisay police mibutyag nga si Patsoy giingon nga nagumon sa paggamit sa gidili nga drugas ug kun wala’y ikapalit og drugas siya ug ang grupo manulis.

Sigon sa imbestigasyon nga si Patsoy magbalhin-balhin kini sa dakbayan sa Sugbo ug Talisay. Nasayran nga ang kapolisan dinhi sa dakbayan sa Sugbo nagpangita usab ni Patsoy kay gitumbok nila kini nga nalambigit sa sunod-sunod nga krimen.

Ang kapolisan sa Talisay nag-andam na og kaso nga ipasaka batok ni Corominas alyas Patsoy kabahin sa pagpatay niini kang Balungkit ug pag-angol sa laing kauban.  (BANAT NEWS)