Lima ka kawani sa duha ka barangay adik

CEBU, Philippines - Lima ka mga empleyado ang nagpositibo sa drugas human sa gipahigayong surprise drug test sa duha ka mga barangay sa dakbayan sa Sugbu miaging Biyernes.

Si Dr. Alice Utlang, ang pangulo sa City Office of Substance Abuse Prevention (COSAP) nga nagpahigayon sa maong test nagkanayon nga upat sa mga trabahante gikan sa Barangay Luz samtang ang usa sa Kinasang-an ang positibong tiggamitan og drugas.

“Sa Barangay Luz, tulo ra actually ang nagpositibo samtang ang ika-upat nikumpisal sa ilang kapitan nga naggamit g’yud siya og drugas,” matud pa ni Utlang sa pakighinabi sa Banat News.

Duha sa nagpositibo mga loader, samtang usa ang barangay tanod, usa ang street cleaner, ug usa ang laborer, butyag pa ni Utlang.

Matud pang Utlang, dunay di muminos 121 ka mga empleyado sa Barangay Luz samtang 95 usab ka mga empleyado sa Kinasang-an ang ilang gipailawom sa maong surprise drug test.

Duna’y mga empleyado sa Kinasang-an nga mga senior citizens ang wala na lang giapil sa maong test base usab sa kamandoan sa barangay kapitan kay klaro, matud pa, nga wala kini maggamitan og drugas, dugang pa ni Utlang.

Ang pangulo sa COSAP nagkanayon nga aduna na’y 35 ka mga barangay nga napailawom sa drug test ug di muminos 106 na ka mga trabahante, gikan sa gibanababang 3,000 ka mga trabahante nga gipailawom sa test, ang nagpositibo sa drugas.

Dugang pahibawo ni Utlang nga duna na’y walo ka mga barangay ang nadeklarar nga drug-free nga sagad mga mountain barangays sama sa Pulangbato, Budlaan, Buhisan, Taptap, Agsungot, Talamban, ug Tabunan.

Si Utlang nagkanayon nga gibalikan nila ang Barangay Tabunan sa niaging Huwebes human wala mapaubos sa drug test ang tanan sa nilang empleyado sa niaging semana, negatibo usab sila. Si Utlang nirekomendar sa barangay nga tagaan og last chance ang mga nagpositibo sa drugas nga makatrabaho og balik sa barangay human sila mapailawom og usa ka rehabilitation sa COSAP pinaagi sa We Care Program niini.

“Pinaagi aning drug test, we can detect early kung kinsa sa mga empleyado ang duna’y sakit sa druga, kay sakit man ni. Apan dili nato sila i-condemn, hinunua tabangan nato sila para masumpo nato ang ilang sakit ug di na sila makapanakod pa sa uban. It will now depend on their (drug users) response,” asoy pa ni Utlang. (BANAT NEWS)