DepEd naalarma sa problema sa TAV sa Talisay

CEBU, Philippines - Nasagmuyo ang regional director sa Department of Education-7, Dr. Carmelita Dulangon, kang Talisay City Division Superintendent Woodrow Denuyo sa wala pagsulbad sa problema sa mga teacher aid volunteers.

Matud ni Dulangon nga naalarma sila sa padayong kontrobersiya sa pagpang-hire og mga magtutudlo sa dakbayan sa Talisay diin ang maong kagubot sukad pa sa milabay’ng tuig.

Usa ka gatos ka volunteers ang miadto sa buhatan ni Mayor Johnny De los Reyes kagahapon aron mangayo og tabang.

Si Geraldine Castro, nadestino sa San Roque Elementary School, mibutyag nga kwalipikado siya sa item sa pagka-regular niadtong Mayo 15, 2014 apan hangtud karon wala pa gihapon siya hatagi ni Denuyo og assignment order.

Matud ni Castro nga adunay samang problema ang iyang kaubanan apan si Denuyo wala mohatag og pagpasabot kanila.

Ang grupo nagplano nga mopadangat og suwat   ngadto sa rehiyonal nga buhatan sa DepEd.

Niining ulahi ang national office mihatag og 46 ka items o bakanteng posisyon aron masulod ang mga volunteers nga kwalipikado aron maluagan ang kagamhanan sa dakbayan nga maoy nagsagubang sa ilang sweldo.

Si Konsehal Dennis Basillote, sakop sa committee on education, nagkanayun nga nagkataas ang gidaghanon sa mga estudyante sa elementary ug high school hinungdan nga nagkinahanglan gyud ang siyudad og dugang magtutudlo.

Matud ni Basillote nga kung unsa man ang desisyon ni Denuyo, ang mga volunteers kinahanglang magpabilin alang sa kaayuhan sa mga estudyante ug sa mga ginikanan niini.

Ang mayor sa iyang bahin nagkanayon nga mopahigayon siya og tigum aron mangita og paagi sa pagsulbad sa problema.

Kagahapon sa buntag, ang kadagkoan sa DepEd sa Talisay nagpahigayun na og tigum.

Samtang si Denuyo nagdumili paghatag og pamahayag sa Banat News sanglit nag-meeting pa sila kabahin sa nahisgutang problema ug kagahapon sa hapon gikatakda usab siyang makigtagbo sa mayor. (/GMR)(BANAT NEWS)