BRT Project aprobado na

CEBU, Philippines - Ang kadagkoan sa City Traffic Operations Management (CITOM) nahinangop kaayo sa kalamboan nga giaprobahan na g’yud sa National Economic Development Authority (NEDA) ang Bus Rapid Transit nga pagamugnaon dinhi sa dakbayan sa Sugbo.

Nagpasabot kini nga ang kagamhanan makasugod na sa gimbuhaton aron mahingpit na nga maka-operate ang BRT sa tuig 2017.

Si CITOM Executive Officer Rafael Christopher Yap mipasabot nga karong giaprobahan na sa NEDA ang BRT project, makasugod na ang kagamhanan sa paghimo og detailed engineering designs.

Samtang ang dakbayan sa Sugbo mopahigayon usab og social management impact aron nga kapangitaan og sulbad ang problema sa mga drayber og PUJ nga nahadlok nga maapektahan ang ilang panginabuhian tungod sa BRT.

Gitataw hinuon ni Yap nga dili g’yud hingpit nga wagtangon ang PUJ sa mga rota nga anha moagi ang BRT, apan magsilbi na lang sila nga secondary transport vehicles.

Ang P10 Bilyones nga BRT project sugdan sa pagpatuman gikan sa Barangay Bulacao - ang katapusang barangay sa habagatang bahin sa dakbayan sa Sugbo - ug mosubay sa Natalio Bacalso Avenue.

Gikan sa Natalio Bacalso Avenue, ang rota sa BRT mosubay sa Osmeña Boulevard ngadto na sa Kapitolyo ug moliko sa dalan Escario, dayon left turn sa Archbishop Reyes Avenue paingon na sa Barangay Talamban.

Ang pletehan sa BRT labaw lang og gamay sa pletehan sa jeepney apan mas bentaha kini tungod kay ang mga bus sagad air-conditioned. Nahinangop ang mga opisyal sa CITOM nga aprobado na sa NEDA ang BRT project.  Si kanhi mayor Tomas Osmeña maoy nagsugyot niini nga proyekto kaniadto nga siya pa ang mayor.

Matud ni Yap nga sutaon nila pag-ayo kun unsaon nga matabangan ang mga apektado nga drayber.

Base sa nahauna nga pamahayag, kadtong mga drayber sa PUJ nga posible’ng maapektahan sa operation sa BRT mahimo nga dawaton sa kompaniya sa mga bus isip mga drayber, mekaniko, konduktor ug uban pa nga mga kawani.

Laing gibutyag ni Yap nga kaayohan nga makuha sa dakbayan sa Sugbo niini’ng pag-aprobar na sa BRT mao nga hayan mo-upgrade usab ang traffic lighting systems sa dakbayan.

Nahibaw-an nga daghan kaayo nga mga traffic lights sa 78 ka major intersections sa dakbayan sa Sugbo ang gubaon na pagka karon. (/RUB)(BANAT NEWS)