Upat ka aftershocks ang nasinati ning semanaha

CEBU, Philippines - Sulod ning semana upat ka mga aftershocks ang nasinati dili lang sa nga Sugbuanon apan lakip na ang mga Bol-anon base sa rekord sa Philippine Institute of Volcanology and Seismology (Phivolcs).

Kagahapon sa buntag usa ka linog ang mipukaw sa mga Sugbuanon, matud ni Rolando Montañez, Science Research Specialist sa Phivolcs-7, nga intensity 4 ang nasinati nga linog sa Buenavista, Bohol, intensity 3 sa Sagbayan, Bohol ug Intensity 2 sa dakbayan sa Lapu-Lapu, Mandaue, Cebu City ug Talibon, Bohol.

Si Montañez miingon nga di pa nila masuta kun hangtod kanus-a nga makasinati og aftershocks ang pipila ka mga dapit nga naapektuhan sa 7.2 magnitude nga linog niadtong Oktubre 15 sa miaging tuig.

Kahinumduman nga nakamugna gyud og kalisang ang linog nga miigo sa Central Visayas  sa nakalabay'ng tuig ug gihimo pang panghadlok sa mga tawong walay lingaw pinaagi sa pagpakatap og mga bakak nga balita.

Ang Phivolcs miawhag sa katawhan nga di gyud dayon motuo ug ang angay buhaton mao nga motukod og earthquake proof nga balay. Sa kinatibuk-an, ang Phivolcs nakatala na og kapin singko mil ka mga aftershocks human sa pagtay-og sa kusog nga linog sa miaging tuig.( /EIM)(BANAT NEWS)